«Cooli Bar, cooli Deko und cools Motto!»

Die 1m- und 4m-Schülerinnen Hanna Schmid und Malina Heymann chatten via Teams über den Kantiball, der vergangenen Samstag stattfand. Sie tauschen sich aus über Eindrücke für diesen Beitrag – und merken, dass ihr Chat den Beitrag gleich selbst liefert: Es geht um Outfits im Motto «Roaring Twenties», die ausgelassene Stimmung und unsere Rektorin, die sich ebenfalls unter die Gäste mischte.

‍

‍

Heute 19:58

Malina schreibt…

Malina: Hoi hoiii, du bisch doch au am Kantiball gsi letschte Samschtig, oder? Wie häschs so gfunde? :)

Hanna: Min erstä Idruck isch gsi, dass äs bitzli leer gsi isch. Chan aber dra liegä, das erscht halbi nüni gsi isch…

Malina: Jaa faiir, mir händ Lüüt vorher gsait, dass me nöd so früeh söt cho, ich bin glaub so am halbi 10i döte gsi. Ich hans crazy gfunde, wievill Security döte gsi isch :D Häsch eigentlich mit dim Outfit zum Motto passt?

Hanna: Ich glaubs. Ich han halt kei Fäderzügs umä ka. Aber ich dänkä dä Schnitt hät scho ungefähr passt. Wiä isch das bi dir gsi???

Malina: Mis Mami hät irgendwie alli Chleider usgrabe, wo voll zu de Roaring Twenties passt händ!! Han so en schwarze Fädereschal gha (e Boa) und en Huet mit ere pinke Blueme druf. Und halt gschminkt und Absatzschue und so. Isch no fancy gsi! Vor allem usem 3mz häts no einigi gha, wo richtig cooli 20er-Jahr-Accessoires aa gha händ :o

Hanna: Wiä cool (: Und jo diä usäm 3mz sind echt mega gsi. Au spöter bim Tanzä han ich au voll diä krassä Sache gseh :D

Malina: Ich han sowieso die goldene Zwanzger no es cools Motto gfunde und mich voll druf gfreut – under anderem, will ich Gatsby als Maturalektüre han… nur schad, häts kei 20er-Johr-Musig gha. So Twist und Jazz… wär voll cool gsi! Trotzdem tolle DJ ;)

Hanna: Ich han d‘Musig eher solala gfundä. Jazz wär sicher viel besser gsi… Aber Stimmig isch trotzdem mega usgloh gsi und alli händs glaube ich cool gfundä.

Malina: Jaa, im Tanzsaal hät irgwie nur Musig, Tanz und Bewegig zellt. Mir sind alli eis worde und alles andere isch soo egal gsi in dem Moment 😍

Hanna: Jooo 🥳🥳

Malina: Wie ischs eig für dich als 1mlerin a dem Ball gsi? Din erschte, oder?

Hanna: Genau. Ich hans sehr cool gfundä. Vor allem, wenn mo mit Kollegä gangä isch. Mo hät immer öpper zum Tanzä ka und halt zum Redä. Ich hans ä mega cooli Stimmig gfundä und au Deko isch voll crazy gsi. Wo ich am Mäntig wieder id Schuäl bin, han ich mir gar nümä chönä vorstellä, dass am Samstig no Party gsi isch. Aber so viel, wiä ich ghört han, isch äs au für dich s‘erscht Mol gsi?

Malina: Jaa, stimmt hahaha, ich bin tatsächlich die letschte drü Mal nie am Ball gsi, irgendwie häts eifach nöd passt. Han sowieso ghört, dass recht villi usem 4m vor allem gange sind, wills halt s letschte Mal isch. Sowiit ich weiss, häts niemert bereut 😇

Hanna: Dän isch jo supii.

Malina: Und ich finds au absolut crazy, wie d Deko gsi isch, ich han üsi Schuel gar nüme erchennt!! Währendem Tanze sait e Fründin plötzlich zu mir: „Hey, vor es paar Wuche händ mir genau do üsen Probeufsatz gschriibe!“ Hani fasch nöd chönne glaube.

Hanna: Oha, das isch au krass. Ä Kollegin vo mir isch ganz erstunnt gsi, dass diä ganz Sauerei am Mäntig wieder weg gsi isch :o

Malina: Jaa, würkli, ich dankä äm Reinigungspersonal, wo das alles am Sunntig hät möse ufruume…..

‍Hanna: Hut ab a sie❤️

Malina: Ich hans uf jede Fall echt e cooli Atmosphäre gfunde, au bim Hiilaufe, mir sind so dur d Dunkelheit, voll de klari Sternehimmel mit üsne Chleider, me het überall Silhouette erchennt vo elegant gkleidete Lüüt, wo sich uf d Kanti zuebewegt händ. Es paar Chind händ üs gfröget, öb Fasnacht isch, wos üs gseh händ :D

Hanna: Das isch bi mir au so gsi. Aber mit Sunnäuntergangs-Stimmig. Mega crazy. Aww, und mir händ äs Kompliment vo äs paar Lüt becho, wo am Griliärä gsi sind!

Malina: Ich finds richtig nice, dass a.) d Kanti so öpis bi sich hosted und b.) s 3mz da so vill inegsteckt hät zum da organisiere. Au nice, dass d Frau Roth sich au under d Gäscht gmischt hät – sogar mit Verchleidig!

Hanna: a) Ich au. So Party machä mit so vielnä Jugendlichä isch au mit viel Chaos verbundä. b) Diä händs mega gmacht. Cooli Bar, cooli Deko und cools Motto. Dass d'Frau Roth cho isch, han ich au nice gfundä. So ächli unter Jugendlichi mischä isch sicher au für sie ä cooli Erfahrig gsi.

Malina: Yup, häsch scho d Föteli ufem intranet gseh – au richtig guet worde!! So tolli Gruppeföteli uf dem Sofa!

Hanna: Jooo! Entweder herzig oder kreativ oder beides😻

Malina: Ich han aso mega vill Positivs über de Ball ghört, e usglassni Party, für 1m bis 4m – führt so zu meh Zämähalt als Schuel.

Hanna: I dä Tat. Ich han zum Biespiel mit Mänschä im Kreis tanzt, wo ich vorher no niä gseh han. Das isch ultra lustig gsi.

Malina: Soo schööön <3

Hanna: Hey, isch jetz würkli hilfriich gsi, mich mit dir über dä Ball z’usztusche, jetzt müend mir nur no de Biitrag für d «pause» schriibe – sind ja schliesslich als Journalistinne underwägs gsiii (:

Malina: Weisch wa, ich han e Idee… mir chönnted au eifach de Chatverlauf als Biitrag neh, nöd? Wär doch originell :D (Und für üs nöd so vill Arbet, hihi)

Hanna: Wiä wers wänn, mir e neui Rubrik us dem ganze mache! z.B. … ChatKFTG!

Malina: Oder au «KFTG schreibt…» oder … «KFTG ungelesen».

Hanna: Na ja, mir überleged üs no en passende Name und denn isch das en mega tolle Biitrag und vllt. sogar e neui Rubrik – mal luege, was d Redaktion dezue seit!

Malina: Find ich e super Idee!! Demfall dir no en schöne Obig :)

Hanna: Danköö glichfalls.

Chat: Hanna Schmid (1mz) und Malina Heymann (4mb) / Bilder: Lukas Diel (3i)

‍